By redaksia 
Nga Redaksia:
Presidenti i SHBA-së, Donald Trump, ka deklaruar se ka miratuar dërgimin e armëve mbrojtëse në Ukrainë, ndërkohë që po shqyrton edhe sanksione të reja të ashpra ndaj Rusisë, duke theksuar pakënaqësinë e tij të hapur ndaj presidentit rus Vladimir Putin, për shkak të rritjes së numrit të viktimave në luftën që po vazhdon mes Rusisë dhe Ukrainës.
Trump, i cili gjatë fushatës presidenciale ishte zotuar se do ta përfundonte këtë luftë brenda një dite, deri tani nuk e ka realizuar këtë premtim, ndërsa përpjekjet e administratës së tij për të ndërmjetësuar paqen kanë dështuar.
Gjatë një mbledhjeje me kabinetin në Shtëpinë e Bardhë të martën, Trump u shpreh hapur kundër Putinit:
“Nuk jam i kënaqur me Putinin. Po ju them që tani”, deklaroi ai, duke theksuar se mijëra ushtarë rusë dhe ukrainas po vriten çdo ditë.
“Kjo po vret shumë njerëz.
Marrim shumë gënjeshtra nga Putini… Ai është shumë i sjellshëm gjithmonë, por në fund del që nuk ka kuptim.”
Trump gjithashtu tha se po e shqyrton seriozisht mbështetjen për një projektligj në Senatin amerikan, i cili do të vendosë sanksione shumë të rënda ndaj Rusisë për shkak të luftës.
Ky projektligj, i propozuar nga senatori republikan Lindsey Graham dhe senatori demokrat Richard Blumenthal, parashikon që çdo vend që tregton me Moskën të ndëshkohet me tarifa 500% për importet nga Rusia, përfshirë naftën, gazin, uraniumin dhe mallra të tjera.
Të hënën, Trump deklaroi se SHBA do të dërgojë më shumë armë në Ukrainë, veçanërisht ato me natyrë mbrojtëse, për të ndihmuar forcat ukrainase kundër avancimeve të Rusisë. Të martën, ai konfirmoi se kishte miratuar dërgimin e armëve.
“Po dërgojmë disa armë mbrojtëse në Ukrainë dhe unë e kam miratuar këtë,” tha Trump.
Kujtojmë se një vendim i mëparshëm nga Pentagoni për të pezulluar disa dërgesa të armëve kritike, nxiti shqetësim në Kiev, pasi kjo do të ndikonte drejtpërdrejt në aftësinë e Ukrainës për të mbrojtur veten nga sulmet ajrore dhe ofensivat e intensifikuara të Rusisë.
Gjatë mbledhjes, Trump, i ulur pranë Sekretarit të Mbrojtjes Pete Hegseth, u pyet se kush e kishte urdhëruar pezullimin e dërgesave. Ai u përgjigj me ironi:
“Nuk e di. Pse nuk ma thoni ju mua?”
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.