By redaksia 
Nga redaksia PatriotikMedia.al
Një qytetar i shqetësuar ka ndarë me redaksinë e JOQ një rast që ngre pikëpyetje të mëdha mbi sigurinë e parasë që qarkullon sot në tregun shqiptar. Ai ka vënë re dy monedha 50 lekëshe, të cilat, ndonëse kanë të njëjtin vlerësim nominal, dallohen dukshëm në pamje, ngjyrë dhe material.
“Kam dy monedha 50 lekëshe. Njëra më duket fallco, ndryshe nga ana e djathtë. Ju lutem, postojeni se ndoshta nuk jam i vetmi që e kam hasur,” – shkruan qytetari.
Fotot që ai ka dërguar tregojnë një diferencë të qartë në ngjyrën metalike, gravurë dhe lustrim, duke nxitur dyshime serioze për qarkullim të monedhave të falsifikuara.
Në mungesë të një njoftimi publik nga Banka e Shqipërisë, qytetarët janë të pambrojtur. Nuk ka asnjë sistem verifikimi të thjeshtë për monedhat dhe shumica e njerëzve nuk kanë as mjetet e as njohuritë për të kuptuar nëse po u jepet një monedhë e vlefshme apo jo.
Ndërkohë që falsifikimi i kartëmonedhave është ndjekur dhe raportuar nga Policia e Shtetit në disa raste, monedhat metalike janë pothuajse të pa kontrolluara në praktikë.
Banka e Shqipërisë nuk ka reaguar publikisht për raste të tilla.
Policia e Shtetit dhe Prokuroria nuk kanë asnjë raport të bërë publik për hetime të falsifikimit të monedhave.
Drejtoria e Hetimit Tatimor nuk ka publikuar asnjë paralajmërim për rreziqet që mund të vijnë nga rrjetet kriminale që falsifikojnë para të vogla për qarkullim të përditshëm.
Falsifikimi i monedhave të vogla mund të duket pa rëndësi, por në realitet është shenjë e dështimit të kontrollit shtetëror mbi sigurinë monetare. Nëse shteti nuk garanton dot vërtetësinë e një monedhe 50 lekëshe, çfarë besimi mund të kenë qytetarët në sistemin financiar?
Thirrje për hetim dhe reagim
PatriotikMedia.al i bën thirrje Bankës së Shqipërisë, Policisë së Shtetit dhe Prokurorisë që:
Të hetojnë dhe verifikojnë publikisht rastet e raportuara për monedha të dyshimta.
Të publikojnë udhëzues për qytetarët se si të dallojnë monedhat e falsifikuara.
Të vendosin një linjë denoncimi të drejtpërdrejtë për raste të ngjashme.
Ekonomia e një vendi nuk mbahet me para të dyshimta. Ajo bie bashkë me besimin e njerëzve.
Nëse ke hasur edhe ti monedha të çuditshme në qarkullim, na dërgo fotot dhe përshkrimin në redaksinë tonë. Bashkë mund ta thyejmë murin e heshtjes.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.