By redaksia 
Nga Redaksia:
Në vend të trokitjes së dasmave, në shumë fshatra të Shqipërisë dëgjohet zhurma e valixheve që mbyllen. Në vend të britmave të fëmijëve në shkolla, dëgjohen erërat që përplasen nëpër dritare të zbrazura. Një komb që po rrëshqet drejt shuarjes, jo nga ndonjë pushtim i armatosur, por nga dorëzimi i heshtur përballë një realiteti pa shpresë.
Shpopullimi i Shqipërisë nuk është thjesht një proces migrator. Është një rrënim i përditshëm, një zbërthim i lidhjeve sociale, ekonomike dhe shpirtërore që mbajnë gjallë një komb. Kur më shumë shqiptarë jetojnë jashtë vendit sesa brenda tij, nuk jemi më përballë një statistike, por një alarmi kombëtar.
Në dyert e ambasadave shtrihet rradha e atyre që duan të ikin. Jo për aventura. Por për jetë. Nga të diplomuarit e rinj që ndjekin punët sezonale në Gjermani, tek mjekët që ndërrojnë betimin për vendin me një kontratë në Itali, deri te familjet që shesin shtëpinë për një biletë avioni drejt Anglisë — Shqipëria po humbet jo vetëm popullsinë, por edhe boshtin e saj të së ardhmes.
Në vend të politikave për të mbajtur të rinjtë, qeveria promovon fasada, propagandë dhe “shkëlqim” mediatik. Ndërkohë, në spitalet periferike mungojnë mjekët. Në shkolla mungojnë nxënësit. Në fshatra mungon jeta.
Ky zbrazje nuk ndodh rastësisht. Ajo është pasojë e një modeli qeverisjeje që e sheh qytetarin si votues të përkohshëm dhe jo si kapital njerëzor. Është pasoja e një drejtësie që ndëshkon të vegjlit dhe mbron oligarkët. Është rezultati i një tranzicioni që, në vend të ndërtimit të një shteti, ndërtoi një piramidë korrupsioni ku të ndershmit s’kanë vend.
Nëse një ditë historia do të gjykojë këtë periudhë, nuk do të mjaftohen me dosje dhe ligje. Do të gjykojnë mbi atë që nuk është bërë: mbi fshatrat e boshatisur, mbi shkollat e mbyllura, mbi familjet e ndara përjetësisht.
Shqipëria ka ende kohë për t’u zgjuar nga kjo amulli. Por kjo kërkon më shumë sesa reformë – kërkon një zgjim kombëtar. Sepse një vend pa popull nuk është më një shtet – është një kujtim.
Ndalohet kopjimi dhe shpërndarja pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.