By redaksia 
Nga Redaksia
Ndërkohë që avionët amerikanë dhe raketat e izraelite trazuan Lindjen e Mesme, në Bruksel ministrat e Jashtëm të Bashkimit Europian u mblodhën me urgjencë… për të diskutuar. Po, për të “diskutuar” dhe “shprehur shqetësim të thellë”. Sepse kur nuk ke asnjë fuqi reale ushtarake, asnjë ndikim në terren, dhe asnjë strategji të përbashkët, të vetmet armë që të kanë mbetur janë fjalimet, deklaratat dhe thirrjet “për vetëpërmbajtje”.
Shefja e politikës së jashtme të BE-së, Kaja Kallas, i bëri thirrje të gjitha palëve “të bëjnë një hap prapa”. Një deklaratë që do të tingëllonte më serioze sikur BE të kishte qoftë edhe një aeroplan të vetëm në pozicion për të ndikuar situatën. Por në vend të forcës, BE prodhon fjalë. Dhe shumë fjalë.
Ndërkohë që SHBA ndërmori sulme direkte mbi objektet bërthamore në Iran, dhe Izraeli kreu ofensiva me mbështetje logjistike amerikane, Bashkimi Europian ka zgjedhur të rrijë në karrigen e konferencave dhe të luajë rolin e moralistit ndërkombëtar. Një moralist pa muskuj, pa forcë, dhe pa dëgjuese.
Ironia e gjithë kësaj është se BE sillet sikur ka rol aktiv në politikën ndërkombëtare, ndërkohë që realisht është kthyer në një platformë burokratike që përpiqet të zgjidhë kriza me “etiketë korrekte”, jo me ndikim real. Sa herë shpërthen një konflikt, europianët nxjerrin të njëjtin skenar: mblidhen, flasin, japin deklaratë, e më pas zhduken pa lënë asnjë gjurmë ndikimi.
Ajo që ndodh në Lindjen e Mesme, është një dëshmi tjetër se rendi botëror nuk merret më seriozisht nga “institucione transatlantike”, por nga ata që kanë vërtet fuqinë për të ndryshuar rrjedhën e ngjarjeve – me ose pa lejen e Brukselit.
Sepse realiteti është ky: në diplomaci, kur nuk ke forcë, fjalët e tua janë vetëm zhurmë në sfond. Dhe BE, për fat të keq, po bëhet gjithnjë e më shumë një kor diplomatik që flet për paqe ndërsa të tjerët bëjnë luftë.
Ky material është pronë e Patriotikmedia.al dhe është i mbrojtur nga ligjet për të drejtën e autorit. Ndalohet riprodhimi, shpërndarja apo publikimi i plotë apo i pjesshëm i këtij materiali pa lejen e shkruar paraprakisht nga redaksia. Shkelësit do të përballen me pasojat ligjore sipas legjislacionit në fuqi.