Nga Redaksia – Kryeministri izraelit Benjamin Netanyahu ka shprehur publikisht kundërshtimin e tij ndaj mundësisë që Shtetet e Bashkuara t’i shesin avionë luftarakë F-35 Turqisë, duke paralajmëruar se një vendim i tillë do të ndryshonte ekuilibrin ushtarak në Lindjen e Mesme.
Në një intervistë për CNN, Netanyahu tha se kishte biseduar drejtpërdrejt me presidentin amerikan Donald Trump, duke i shprehur shqetësimin për pasojat që mund të kishte furnizimi i Turqisë me avionët më modernë amerikanë.
“I thashë presidentit Trump se kjo mund të prishë ekuilibrin e forcave në rajon,” deklaroi Netanyahu.
“Turqia nuk është shtet miqësor”
Kryeministri izraelit u shpreh se, pavarësisht marrëdhënieve personale mes Trump dhe presidentit turk Recep Tayyip Erdogan, Turqia nuk mund të konsiderohet një aleat i besueshëm i Shteteve të Bashkuara.
Sipas Netanyahu-t, Ankaraja mban lidhje me Vëllazërinë Myslimane (Muslim Brotherhood), mbështet Hamasin dhe ka një histori të burgosjes së kundërshtarëve politikë dhe gazetarëve.
“Ai nuk është tamam modeli i një aleati të Shteteve të Bashkuara,” tha Netanyahu.
Ai shtoi se Erdogan ka kërcënuar vazhdimisht Izraelin dhe disa aleatë të NATO-s.
Akuza për ambicie neo-osmane
Netanyahu akuzoi presidentin turk se ndjek një politikë ekspansioniste.
“Turqia ka aspirata agresive. Ata e thonë hapur se duan të rikthejnë Perandorinë Osmane,” deklaroi ai.
Deklarata vjen në një kohë kur marrëdhëniet mes Izraelit dhe Turqisë mbeten të tensionuara për shkak të luftës në Gaza dhe përplasjes së vazhdueshme politike mes Erdogan dhe Netanyahu-t.
Marrëdhëniet me Trump
Pavarësisht mospajtimeve për disa çështje, Netanyahu theksoi se ai dhe Donald Trump mbeten në një linjë për temat strategjike.
Ai lavdëroi presidentin amerikan për mbështetjen ndaj Izraelit gjatë konfliktit me Iranin dhe tha se të dy ndajnë të njëjtin qëndrim se Irani nuk duhet të lejohet të zotërojë armë bërthamore.
“Me marrëveshje apo pa marrëveshje, unë nuk do ta lejoj Iranin të ketë armë bërthamore,” deklaroi Netanyahu.
Dhuna e kolonëve hebrenj në Bregun Perëndimor
Netanyahu komentoi edhe incidentet e fundit të dhunës së kolonëve izraelitë ndaj palestinezëve në Bregun Perëndimor.
Ai i dënoi këto akte, duke thënë se ato bien ndesh me ligjin dhe normat themelore të shtetit izraelit.
“Qytetarët tanë nuk mund të ushtrojnë dhunë ndaj askujt. Rendin duhet ta zbatojnë policia dhe ushtria, jo individët,” u shpreh ai.
Kryeministri premtoi se çdo incident do të hetohet, duke shtuar se Izraeli është një demokraci ku ngjarje të tilla nuk mund të fshihen.
Debati mbi F-35 pritet të vazhdojë
Deklaratat e Netanyahu-t pritet të shtojnë debatet rreth mundësisë së rikthimit të Turqisë në programin e avionëve F-35, nga i cili Ankaraja u përjashtua pas blerjes së sistemit rus të mbrojtjes ajrore S-400.
Nëse administrata Trump vendos të ecë përpara me shitjen e avionëve, kjo mund të hapë një kapitull të ri në marrëdhëniet SHBA-Turqi, por njëkohësisht të rrisë tensionet me Izraelin, i cili kërkon të ruajë epërsinë e tij ushtarake në rajon.
Ndalohet kopjimi sipas ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar PatriotikMedia.al
