Nga Redaksia – Një lajm që ka shkaktuar debat dhe shqetësim të madh publik po qarkullon së fundmi në Shqipëri: në ambientet e QSUT-së pritet të ofrohen terapi hormonale për persona transgjinorë, madje duke filluar nga mosha 14-vjeçare. Pikërisht kjo është pika që ka tronditur shumë prindër dhe qytetarë shqiptarë.
14 vjeç?
Një fëmijë në atë moshë sapo ka hyrë në adoleshencë. Është periudha kur karakteri, emocionet dhe identiteti janë ende në formim. Shumica e adoleshentëve në këtë moshë mezi kuptojnë ndjesitë e para të simpatisë, pëlqimit apo të asaj që quhet “dashuri platonike”. Si mund të merret një vendim kaq i rëndë dhe me pasoja të përhershme mbi trupin dhe jetën e tyre?
Shqetësimi nuk lidhet me urrejtje ndaj askujt, por me pyetjen themelore: a është një 14-vjeçar psikologjikisht i pjekur për të kuptuar pasoja kaq të mëdha? Terapitë hormonale nuk janë lojë. Ato ndikojnë trupin, zhvillimin biologjik dhe gjendjen emocionale për vite të tëra.
Në shumë vende të botës po rritet debati pikërisht mbi këtë çështje. Ka raste të dokumentuara ku persona që në moshë të vogël janë shtyrë drejt tranzicionit gjinor, vite më vonë kanë deklaruar pendesë të thellë dhe kanë akuzuar mjekët apo psikologët për nxitim dhe mungesë përgjegjësie. Rasti i vajzës transgjinore që paditi psikiatrin e saj pas ndërrimit të gjinisë është bërë simbol i këtij debati global.
Në vend që të nxitohet drejt trajtimeve hormonale për të mitur, shumë specialistë kërkojnë kujdes maksimal, mbështetje psikologjike dhe kohë për reflektim. Sepse adoleshenca është faza më delikate e jetës njerëzore.
Ky vendim duhet rishikuar urgjentisht. Çështja nuk është politike, por njerëzore dhe familjare. Shqipëria nuk mund të eksperimentojë me fëmijët e saj duke importuar modele që edhe vetë Perëndimi sot po i diskuton dhe po i vendos në pikëpyetje.
Prindërit kanë të drejtë të kërkojnë transparencë:
Kush e mori këtë vendim?
Cilat janë protokollet?
Cilët ekspertë kanë dhënë miratim?
Dhe mbi të gjitha, kush mban përgjegjësi nëse pas disa vitesh këta të rinj pendohen?
Shqiptarët duhet të reagojnë për mbrojtjen e familjes, fëmijëve dhe të ardhmes së vendit. Sepse kur preket fëmija, preket vetë themeli i kombit.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.