By redaksia 
Nga Redi Minga
Prej vitit 1991, Shqipëria është mbajtur në një status të përhershëm “kandidat në pritje” për t’u integruar në Bashkimin Europian. Në 34 vite, janë firmosur dhjetëra marrëveshje, janë hedhur qindra firma, janë zhvilluar qindra samite – por realiteti mbetet një: Shqipëria është ende jashtë BE-së, dhe fajtor është politika shqiptare.
- Mashtrimi i parë: “U liberalizuan vizat” – dhe filloi largimi biblik
Në vitin 2010, qeveria shqiptare shpalli me bujë “liberalizimin e vizave”. Politikanët e të gjitha krahëve e shitën si fitore kombëtare, ndërkohë që në fakt shqiptarëve iu dhanë vetëm 90 ditë për të udhëtuar, jo të drejtë pune, jete apo integrimi. Brenda pak muajsh, Shqipëria u kthye në vendin me numrin më të madh të azilkërkuesve në Europë. Kjo u përdor më pas nga vetë BE për të na etiketuar si “popull problematik” dhe për të shtyrë integrimin.
- Mashtrimi i dytë: “Negociatat kanë nisur” – por askush nuk hap kapituj
Nga 2014 deri më sot, çdo qeveri ka shpallur “hapjen e negociatave”. Në realitet, asnjë kapitull nuk është hapur formalisht, dhe çdo vit është një përsëritje e të njëjtës gënjeshtër. Edi Rama, që ka firmosur më shumë marrëveshje se kushdo, i ka përdorur negociatat si fasadë për të vendosur një shtet të kontrolluar nga klientela, jo nga ligji.
- Mashtrimi i tretë: Reforma në Drejtësi – Kontrolli total i pushtetit
BE financoi Reformën në Drejtësi me miliona euro. Çfarë ndodhi? Rama e përdori këtë reformë për të kapur të gjitha institucionet – nga Gjykata Kushtetuese te SPAK-u. Asnjë peshk i madh nuk është dënuar. Në vend të drejtësisë europiane, kemi drejtësi selektive që ndëshkon opozitën dhe mbron pushtetin.
- Fajtorët kanë emra: Politika që ka sunduar me mashtrime
Sali Berisha e nisi “reformën drejt BE-së” me piramidat financiare që rrënuan vendin dhe e çuan në luftë civile.
Fatos Nano lejoi penetrimin grek në administratë, media dhe ekonomi.
Ilir Meta, ministër i jashtëm, kryeministër e president, përdori gjithmonë integrimin si mashë për pazare politike.
Edi Rama, më aktivisti i Sorosit në Ballkan, shkatërroi zgjedhjet, e mbylli shtypin dhe i dorëzoi burimet strategjike të vendit klientelës së huaj.
- Pse Europa nuk na do? Sepse politika shqiptare është pasqyra më e keqe
Nuk është populli shqiptar që është refuzuar – është klasa politike shqiptare që e ka përfaqësuar vendin në mënyrë të turpshme. Europa sheh krimin, drogën, korrupsionin, sistemin arsimor të shkatërruar, emigracionin masiv – dhe sheh se këto janë produkt i politikës, jo i qytetarëve.
- Bashkimi i Kombit, jo integrimi fallco
Asnjë vend i Ballkanit nuk ka hyrë në BE pa stabilitet kombëtar. Kroacia e bashkoi tokën dhe u bë anëtare. Sllovenia po ashtu. Serbia lufton për Kosovën dhe ka nisur negociata. Vetëm Shqipëria e ka ndarë kombin dhe kërkon BE si lypsar.
Si mund të hyjmë në BE pa Kosovën, pa Preshevën, pa Çamërinë, pa Malësinë, pa shqiptarët e Maqedonisë që janë lënë jashtë politikës së Tiranës? Integrimi pa bashkim është iluzion. Nuk ekziston një BE pa dinjitet kombëtar. Vetëm një Shqipëri e bashkuar, me trojet në një platformë politike e kombëtare, mund të ulet e barabartë në tryezën europiane.
- BE nuk është zgjidhje për shqiptarët, është provim për politikën shqiptare
Shqiptarët janë provuar – janë populli më punëtor në Europë, më i disiplinuar kur u liberalizuan vizat, më i integruar në diasporë. Janë elita politike shqiptare që dështuan. Kanë gënjyer për 34 vjet, kanë shitur integrimin për pushtet, dhe tani faji i mbetet popullit.
- Shqipëria në BE? Vetëm kur të pastrohet nga tradhtarët
Kjo nuk është çështje teknike, por ekzistenciale. Derisa në politikë të jenë ata që firmosën marrëveshje të dëmshme, që shitën pronat, që dorëzuan energjinë, detin dhe identitetin, nuk ka BE. Ka vetëm zvarritje, varfëri dhe dëbim masiv.
Kjo është e vërteta e integrimit shqiptar. Shqipëria nuk do të hyjë në BE me servilizëm dhe me fasadë. Ajo do të bëhet Europiane kur të jetë Komb – e bashkuar, e pastër dhe e drejtuar nga shqiptarë që kanë gjak në zemër, jo dollarë në xhep.
Shënim: Kush është Redi Minga
Ai është shkrimtar, analist dhe redaktor i Patriotikmedia.com, Patriotikmedia.al si dhe i Stopfakealbania.com. Origjina e tij është nga qyteti i Tiranes, ai u zhvendos në Zvicer për të punuar për një media Zviceriane, sot ai punon për Patriotik Media Albania dhe që atëherë ka vazhduar të punojë në rolin e analistit ku ka bërë shumë analiza dhe editoriale në disa portale Zviceriane. Biles ai ka shkruar gjithashtu edhe për disa portale amerikane.
Ndalohet kopjimi dhe shpërndarja pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.