Nga Redaksia:
Njeriu më i pasur në botë dhe drejtuesi ekzekutiv i Tesla dhe SpaceX, Elon Musk, dha një intervistë të gjatë për podkastin The Katie Miller Podcast, ku për gati një orë foli pa filtra për politikën, inteligjencën artificiale, besimin, jetën personale dhe sfidat e epokës moderne.
Intervista, e transmetuar në platformën X (ish-Twitter), u bë virale brenda pak orësh, duke mbledhur miliona shikime dhe reagime të shumta. Shumë e vlerësuan Musk për sinqeritetin dhe thellësinë e tij, duke zbuluar një anë serioze, reflektuese dhe filozofike të magnatit të teknologjisë.
Eksperienca në qeveri dhe “DOGE”
Gjatë bisedës, Musk tregoi për eksperiencën e tij të pazakontë në krye të Departamentit të Efiçencës Qeveritare të SHBA-së (DOGE), një strukturë e përkohshme e krijuar për të reduktuar shpërdorimin dhe burokracinë shtetërore. E pagëzuar me emrin e memës Dogecoin, DOGE synonte shkurtime drastike të shpenzimeve publike.
Musk e përshkroi këtë përvojë si “disi të suksesshme”, duke theksuar se u arrit të ndaleshin shumë shpenzime të panevojshme. Megjithatë, ai pranoi se, po t’i kthehej koha pas, nuk do të përfshihej më:
“Do të preferoja të përqendrohesha te kompanitë e mia. Ndoshta kështu, makinat Tesla nuk do të ishin djegur.”
Edhe pse DOGE u mbyll në fillim të vitit 2025, Musk tha se kjo strukturë nxori në pah korrupsion të thellë dhe konflikte serioze interesi brenda qeverisë. Sipas tij, sapo preken interesa të ngulitura, reagimi është i ashpër dhe i pamëshirshëm, gjë që solli bojkotime dhe sabotime edhe ndaj kompanive të tij.
Frika nga Inteligjenca Artificiale
Një nga momentet më të forta të intervistës ishte kur Musk foli për inteligjencën artificiale. Ai pranoi se shpesh sheh makthe për AI-në, deri në atë pikë sa zgjohet disa herë gjatë natës.
“Kam pasur shumë makthe për AI-në… Nëse do të mundesha, do të përpiqesha të ngadalësoja zhvillimin e inteligjencës artificiale dhe robotëve, por realisht nuk mundem,” – tha Musk.
Ai e përshkroi AI-në si një armë me dy tehe: një motor progresi për njerëzimin, por edhe një kërcënim potencial serioz. Sipas tij, presioni i vazhdueshëm i epokës së informacionit dhe nevoja për t’u përshtatur me shpejtësi ekstreme janë “vrasësi i vërtetë i mendjes”.
Musk dhe Trump: nga tensioni tek batutat
Në një ton më të lehtë, Musk foli edhe për presidentin Donald Trump, duke e quajtur “njeriun më qesharak”. Ai vlerësoi humorin natyral dhe spontan të Trump, duke treguar një episod nga një takim në Shtëpinë e Bardhë me ligjvënësin Zohran Mamdani, ku një batutë e improvizuar krijoi një atmosferë absurde dhe argëtuese.
Ky moment tregoi jo vetëm respektin e Musk për Trump, por edhe evolucionin e marrëdhënies së tyre – nga tensioni fillestar drejt një afrimi dhe pajtimi të qartë.
“Unë admiroj Krijuesin”
Momenti më i fortë dhe më i komentuar i intervistës erdhi kur Katie Miller e pyeti Musk se kë admironte më shumë. Duke lënë mënjanë humorin, ai u përgjigj shkurt dhe seriozisht:
“Krijuesin.”
Kur u pyet për qëndrimin e tij ndaj Zotit, Musk u shpreh:
“Zoti është Krijuesi. Unë besoj se ky univers ka dalë nga diçka.”
Edhe pse nuk i përket kornizave tradicionale fetare, Musk shprehu bindjen e tij në një forcë krijuese superiore, që qëndron përtej shkencës. Kjo deklaratë ndezi debate globale: si e balancon një nga figurat më të rëndësishme të teknologjisë racionalitetin shkencor me besimin?
Jeta, familja dhe e ardhmja
Duke reflektuar mbi jetën e tij, Musk tha se momentet që do të donte t’i jetonte sërish janë lindja e fëmijëve të tij, suksesi i parë orbital i SpaceX dhe funksionimi i suksesshëm i makinave Tesla – një tregues i vlerës që ai i jep familjes dhe arritjeve reale.
Ai kritikoi gjithashtu ritmin e çmendur të kohës moderne, duke thënë se videot e shkurtra “mund të gërryejnë ndërgjegjen publike” dhe se shumë përmbajtje virale është e panevojshme.
Megjithatë, Musk mbetet optimist për natyrën njerëzore. Sipas tij, rritja e ndërgjegjes njerëzore është çelësi për të kuptuar universin. Ai zbuloi plane për zgjerimin e Starbase në Teksas, krijimin e komuniteteve të reja industriale dhe përmirësimin e algoritmit të X për të promovuar përmbajtje cilësore dhe energji pozitive në internet.
Në fund, me humor romantik, Musk tha se do të donte të darkonte me William Shakespeare, Benjamin Franklin dhe Nikola Tesla – me një hamburger të thjeshtë si menu.
Kjo intervistë e shfaqi Elon Musk-un në të gjitha dimensionet e tij: kritik ndaj pushtetit, i shqetësuar për teknologjinë, i mprehtë në humor dhe i thellë në filozofi. Një bisedë që ngre një pyetje thelbësore për fundin e vitit 2025: në garën për progres, si mund ta ruajmë paqen e brendshme dhe besimin?