Minatorët: “Kjo është grabitja më e madhe që nga viti 1939!”
Nga Redaksia:
Një akuzë tronditëse vjen nga minatorët grevistë të Spaçit, të cilët i kërkojnë shtetit shqiptar hetim urgjent mbi pasuritë e çmuara të nëntokës që, sipas tyre, janë nxjerrë për 7 vite me radhë pa asnjë transparencë nga kompania koncesionare Tete Albania.
Sipas deklaratës së tyre publike, në vitet 2018–2025 janë nxjerrë rreth 2 ton ar, vlerë kolosale e cila nuk figuron në asnjë raport zyrtar të institucioneve shtetërore.
Nëse këto të dhëna vërtetohen, Shqipëria ka të bëjë me skandalin më të madh ekonomik të këtyre 34 viteve.
Çfarë thonë minatorët?
Minatorët e Spaçit deklarojnë:
Spaçi është zonë e studiuar prej 70 vitesh.
Çdo ton mineral bakri përmban 13–16 gram ar dhe argjend si përbërës shoqërues.
Kompania raporton prodhim ditor prej 70 ton koncentrat bakri.
Kjo përkthehet në rreth 1 kg ar në ditë.
Në 7 vite bëhet fjalë për rreth 2016 kg ar.
Por asnjë institucion shtetëror nuk ka publikuar raportet laboratorike të Au/Ag, bilancet metalurgjike mujore apo dokumentet e shitjes së përbërësve të çmuar.
Sipas minatorëve, heshtja e institucioneve nuk është thjesht neglizhencë – por bashkëpunim.
Pyetjet që po tronditin opinionin publik
Minatorët kërkojnë përgjigje:
Ku është ky ar?
Ku janë raportet teknike të prodhimit?
Kush e ka monitoruar kompaninë?
Pse shteti ka heshtur për 7 vite?
Pse nuk publikohen bilancet metalurgjike mujore?
Këto pyetje nuk mund të anashkalohen. Ato shkojnë në zemër të pasurisë kombëtare.
Detyrimet që ligji i kërkon shtetit dhe kompanisë
Sipas Kushtetutës:
Neni 11: Pasuritë nëntokësore janë pronë ekskluzive e shtetit.
Neni 153: Shteti detyrohet t’i administrojë dhe t’i mbrojë ato.
Neni 15: Askush nuk është mbi ligjin.
Sipas Ligjit Minerar, kompania duhet të raportojë çdo përbërës shoqërues (ar, argjend, zink, arsenik) dhe të dorëzojë bilancet metalurgjike mujore.
Institucionet duhet të kontrollojnë çdo gram të prodhimit.
Asgjë nga këto nuk është bërë transparente për publikun.
Kërkesat e minatorëve: Një ultimatum për shtetin
Minatorët kërkojnë:
- Audit të pavarur shtetëror dhe ndërkombëtar për prodhimin 2018–2025.
- Zbardhjen e të gjitha analizave laboratorike të Au/Ag.
- Publikimin e bilanceve metalurgjike mujore dhe vjetore.
- Rikthimin në buxhet të çdo vlere të përfituar padrejtësisht.
- Ngritjen e një komisioni hetimor parlamentar.
Ata thonë se kjo është “nxjerrja më e madhe e mineraleve të çmuara jashtë vendit që nga prilli i vitit 1939”.
Pse duhet hetim?
Sepse pasuritë e Shqipërisë nuk janë pronë e qeveritarëve, oligarkëve apo kompanive fantazmë.
Janë pronë e popullit shqiptar.
Populli ka të drejtë të dijë:
- sa ar është nxjerrë,
- ku ka shkuar,
- kush ka firmosur,
- kush ka heshtur,
- dhe kush duhet të mbajë përgjegjësi.
Spaçi nuk hesht më
Ky denoncim nuk është një revoltë e zakonshme.
Është një alarm kombëtar për fatin e pasurive të Shqipërisë.
Minatorët nuk kërkojnë as politikë, as lëmoshë – por vetëm:
Drejtësi, transparencë dhe llogaridhënie.
Sepse pasuritë e këtij vendi i përkasin vetëm popullit shqiptar.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.