Nga Redaksia:
Në Shqipëri, ajo që dihet nga të gjithë zbulohet gjithmonë “rastësisht” me shumë vonesë nga institucionet që paguhen për të bërë pikërisht këtë punë. Këtë herë, është SPAK-u që del me një “sensacion” të madh: më në fund ka kuptuar se bankat shqiptare të nivelit të dytë janë përdorur për pastrimin e parave të pista.
Si për ironi, në listën e zbuluar del edhe një nga bankat më të mëdha dhe më të njohura, Raiffeisen Bank, NOA
Por a është kjo vërtet ndonjë risi? Jo, është thjesht një sekret i hapur, që shqiptarët e dinë prej vitesh.
Nga Société Générale te NBG Bank – rastet që u harruan me “lezet”
Le të kujtojmë vetëm disa raste:
Société Générale (bankë franceze) – më shumë se 12 vite më parë emri i saj lidhej hapur me qarkullimin e parave të Ndragetës në Shqipëri. Dokumente dolën, shkrime u botuan, por askush nuk u trazua. Banka u tërhoq më vonë nga tregu shqiptar, por asnjëherë nuk pati një hetim serioz.
NBG Bank (greke) – një tjetër bankë e madhe që për vite me radhë u përfol për shërbime të dyshimta transferimi dhe pastrimi parash nga biznesmenë dhe politikanë shqiptarë të lidhur me kontrabanda e korrupsion.
Credit Agricole – një tjetër bankë franceze që hyri me bujë dhe doli me heshtje, duke lënë pas një sërë dyshimesh për përdorimin e saj në kanalet e parasë së zezë, por që u mbyll pa zhurmë.
BKT (Banka Kombëtare Tregtare) – edhe pse është banka më e madhe në Shqipëri, nuk ka shpëtuar kurrë nga dyshimet e opinionit publik për lidhje me transaksione të errëta, sidomos përmes koncesioneve dhe tenderëve qeveritarë ku paratë kalojnë “lirisht” nëpër duart e saj.
Dhe lista mund të vazhdojë: bankat italiane të vogla që kanë hyrë e dalë në Shqipëri, bankat turke me lidhje të dyshimta, apo bankat me kapital “të huaj” por të përdorura si mbulesë për para të oligarkëve vendas.
Sot SPAK-u na thotë se paska zbuluar “rastin e madh”. Por shqiptarët me të drejtë pyesin:
pse pikërisht tani?
Mos vallë nuk bëhet fjalë për një hetim të vërtetë, apo për një shenjë konkurencash mafioze në sektorin bankar? Sepse, siç thotë populli, “kur prishen hesapet, del tymi”.
Nëse do të kishte vërtet drejtësi, hetimet nuk do të nisnin vetëm nga një bankë e vetme, por nga i gjithë sistemi bankar shqiptar, i cili prej dekadash është kthyer në lavanderi parash të mafies, korrupsionit dhe krimit të organizuar ndërkombëtar.
Është e trishtueshme që në vitin 2025 ende na serviren si “zbulime të mëdha” gjëra që çdo qytetar i zakonshëm i di prej kohësh.
SPAK-u sot bën sikur zbuloi UFO-t, ndërkohë që bankat e Shqipërisë prej 30 vitesh janë porta hyrëse e parasë së zezë – me miratimin e heshtur të politikës dhe pushtetit.
Pyetja e vetme që mbetet është:
A do të guxojë SPAK-u të shkojë deri në fund dhe të prekë të gjithë bankat, apo ky është vetëm një show për të mbajtur gjallë mitin e një “drejtësie të re” që, në fakt, i shërben po të njëjtës kastë?
Ky material është pronë e Patriotikmedia.al dhe është i mbrojtur nga ligjet për të drejtën e autorit. Ndalohet riprodhimi, apo publikimi i plotë apo i pjesshëm i këtij materiali pa lejen e shkruar paraprakisht nga redaksia. Shkelësit do të përballen me pasojat ligjore sipas legjislacionit në fuqi.
