A thua e hëngri edhe Sara Mila, apo një tjetër dosje rrezikon të mbetet në sirtarët e SPAK-ut …
Nga Redaksia – A është hetimi ndaj deputetes socialiste Sara Mila fillimi i një procesi të vërtetë drejt zbardhjes së dyshimeve për korrupsion zgjedhor, apo kemi të bëjmë me një tjetër spektakël mediatik të Prokurorisë së Posaçme, ku buja e thirrjeve dhe deklaratave publike është shumë më e madhe se rezultatet konkrete?
Kreu i Prokurorisë së Posaçme, Klodian Braho, ka konfirmuar se SPAK ka regjistruar një hetim ndaj deputetes së Partisë Socialiste, Sara Mila. Deklarata e tij vjen pesë ditë pas paraqitjes së deputetes së qarkut të Elbasanit në ambientet e SPAK, më 11 nëntor.
Sipas raportimeve, Mila qëndroi rreth 40 minuta deri në një orë në Prokurorinë e Posaçme, ku u pyet nga hetuesit. Në përfundim të paraqitjes, ajo deklaroi se ishte thirrur në cilësinë e personit që disponon dijeni për çështjen dhe se kishte dhënë shpjegimet e saj.
Por çfarë po heton konkretisht SPAK?
Në fokus të hetimeve, sipas raportimeve mediatike, janë dyshimet për korrupsion zgjedhor në qarkun e Elbasanit, ku pretendohet se skema e ndihmës ekonomike mund të jetë përdorur për të ndikuar te votuesit gjatë zgjedhjeve parlamentare të vitit 2025.
Kreu i SPAK, Klodian Braho, është treguar i rezervuar për detajet, duke u mjaftuar me konfirmimin se hetimi është regjistruar dhe se ai vijon.
Por pyetja që shtrohet është: deri kur do të mbeten hetimet e SPAK vetëm në nivelin e thirrjeve, marrjeve në pyetje dhe deklaratave për mediat?
© Copyright of PatriotikMedia.al
SPAK dhe paradoksi i madh: Shumë emra, pak rezultate të dukshme!
Prej vitesh, Prokuroria e Posaçme ka thirrur dhe marrë në pyetje politikanë, zyrtarë të lartë, ish-ministra, deputetë dhe drejtues institucionesh. Emra të njohur kanë kaluar në dyert e saj, ndërsa dosje të shumta kanë prodhuar tituj të mëdhenj në media.
Megjithatë, përballë kësaj panorame lind një shqetësim legjitim publik: sa prej këtyre hetimeve kanë përfunduar me vendime përfundimtare dënimi, konfiskim të pasurive të pajustifikuara dhe kthim të parave në buxhetin e shtetit?
Nuk mjafton që një politikan të thirret në SPAK për të krijuar përshtypjen se drejtësia ka dhënë rezultat. Nuk mjafton as një deklaratë për regjistrimin e një hetimi për ta konsideruar një çështje të zbardhur.
Qytetarët presin prova, përgjegjësi penale kur provohet fajësia dhe vendime gjyqësore të formës së prerë. Ata presin që drejtësia të mos ndalet te zhurma mediatike, por të shkojë deri në fund.
A do të jetë Sara Mila një tjetër kapitull i spektaklit politik?
Rasti i Sara Milës ngre pikëpyetje të rëndësishme, sidomos për shkak të natyrës së dyshimeve që lidhen me përdorimin e mundshëm të ndihmës ekonomike për qëllime elektorale.
Nëse këto dyshime provohen, atëherë kemi të bëjmë me një çështje serioze që prek jo vetëm integritetin e zgjedhjeve, por edhe dinjitetin e qytetarëve që varen nga ndihma ekonomike.
Por nëse hetimi do të mbetet vetëm te deklaratat, thirrjet dhe kronikat televizive, atëherë do të kemi sërish të njëjtin skenar: shumë zhurmë në fillim dhe pak transparencë në fund.
A thua e hëngri edhe Sara Mila, apo kjo është thjesht një tjetër shfaqje në teatrin e madh të drejtësisë shqiptare?
SPAK duhet të tregojë me fakte se nuk është një institucion që prodhon vetëm lajme, por një prokurori që çon deri në fund hetimet për këdo, pavarësisht partisë, pushtetit apo postit që mban.
© Copyright of PatriotikMedia.al


