Gazetari Çollaku: Mbledhja e PS-së ishte më shumë një asamble ushtarake, Rama mbrojti të pandehurit e tij brenda dhe jashtë sallës … (VIDEO)
Nga Redaksia – Gazetari Basir Çollaku ka komentuar mbledhjen e Asamblesë së Partisë Socialiste, duke e cilësuar atë si një tubim luftarak, ku kryeministri Edi Rama, sipas tij, ushtroi presion mbi vartësit dhe u doli në mbrojtje personave të përfshirë në çështje të ndryshme hetimore.
Në një intervistë për Syri TV, Çollaku u shpreh se ajo që u pa gjatë Asamblesë së PS-së ishte një mbledhje e kontrolluar, ku mungoi reagimi i lirë i përfaqësuesve të partisë dhe ku diskutimet kryesore u zhvilluan me dyer të mbyllura.
Sipas gazetarit, atmosfera e krijuar në sallë i ngjante më shumë një asambleje ushtarake sesa një forumi politik, ku anëtarët duhet të kenë mundësi të shprehin mendimet dhe qëndrimet e tyre.
“Ajo çfarë pamë dje ishte më së shumti një asamble ushtarake. Le të themi një tubim luftarak i kryeministrit, kryetarit të partisë së gjithëpushtetshme, i cili mendoi të ushtrojë edhe një herë presion mbi vartësit. Sepse aty unë nuk shoh njeri që të flasë, të reagojë apo të sillet ndryshe”, deklaroi Çollaku.
Gazetari u ndal edhe te prania e disa figurave politike në rreshtat e parë të sallës, duke e përshkruar këtë pamje si një rresht dosjesh, që sipas tij të krijonte përshtypjen e një ambienti prokurorie apo gjykate.
“Mua më duk si një rresht me dosje, të paktën rreshti i parë. Se kishte edhe më tutje, më thellë. Por vitrina ishte e kësaj natyre dhe e kësaj përmase. Dhe kryeprokurori që u thoshte se vetëm unë jam shpëtimtari juaj”, u shpreh ai, duke iu referuar mënyrës se si Rama, sipas tij, paraqiti veten si mbrojtës të njerëzve të tij.
Çollaku: Rama po mbron ata që mund të flasin kundër tij
Një tjetër pikë e fortë e deklaratës së gazetarit ishte ajo që ai e cilësoi si mbrojtje politike të personave që mund të kenë informacione komprometuese për kryeministrin.
Çollaku përmendi emrat e Belinda Ballukut, Erion Veliajt, Taulant Ballës, si dhe të disa ministrave të tjerë, aktualë apo ish-ministra, duke pretenduar se Rama po tregohet i kujdesshëm në qëndrimet e tij ndaj tyre, për shkak të informacioneve që ata mund të bëjnë publike.
Sipas tij, kryeministri po përpiqet të ruajë kontrollin politik mbi njerëzit e tij, duke shmangur njëkohësisht deklaratat që mund të krijojnë pasoja për të.
Gazetari kritikoi gjithashtu mungesën e reagimit brenda strukturave të Partisë Socialiste, duke e lidhur këtë me përqendrimin e pushtetit në duart e kryeministrit.
Në vijim të analizës së tij, Çollaku bëri edhe një paralelizëm me të kaluarën komuniste, duke vënë në dukje ngjashmëritë që, sipas tij, shfaqen në raportin mes kryetarit të partisë dhe strukturave të saj.
Deklaratat e Basir Çollakut rikthejnë në vëmendje debatet mbi mënyrën e funksionimit të Partisë Socialiste, raportin e saj me pushtetin dhe qëndrimin e kryeministrit Rama përballë zhvillimeve që prekin figura të rëndësishme të mazhorancës.
© Copyright of PatriotikMedia.al


