Nga Redaksia:
Edi Rama kërkon 84 vota për të kaluar Reformën Territoriale, por përpara votimit final mazhoranca përballet me një betejë të fortë brenda vetë Partisë Socialiste. Erion Braçe mbetet kundër, Vullnet Sinaj ka ndryshuar qëndrim dhe pritet të votojë pro, ndërsa mungesa e Belinda Ballukut në mbledhjen e mëngjesit ka shtuar pikëpyetjet për numrat. Nëse një votë mungon, Territorialja mund të mbetet pa shumicën e cilësuar.
Kuvendi i Shqipërisë po shkon drejt votimit të një prej reformave më të rëndësishme politike të kësaj legjislature. Drafti i Partisë Socialiste parashikon uljen e numrit të bashkive nga 61 në 46, përmes shkrirjes së 15 bashkive.
Por sonte beteja nuk është vetëm për hartën e re të Shqipërisë.
Beteja është për 84 votat.
Pikërisht ky numër e ka futur mazhorancën në një llogari të ngushtë politike, ku çdo mungesë apo votë kundër mund të bëhet vendimtare.
Rama përballë Braçes
Në mbledhjen e Grupit Parlamentar të PS-së, kryeministri Edi Rama është përplasur me deputetin Erion Braçe për qëndrimin ndaj reformës.
Braçe ka konfirmuar kundërshtimin e tij ndaj draftit, duke argumentuar se ndryshimi i hartës nuk mjafton dhe se reforma duhet të shoqërohet me forcimin e autonomisë dhe decentralizimit vendor.
Kjo e vendos një nga deputetët më kritikë brenda PS-së në një pozicion të drejtpërdrejtë përballë qëndrimit zyrtar të mazhorancës.
Dhe këtu nis problemi i numrave.
Sinaj ndryshon qëndrim
Nëse në mbledhjen e mëparshme Erion Braçe dhe Vullnet Sinaj kishin shprehur kundërshtime ndaj draftit, situata ndryshoi këtë mëngjes.
Sipas raportimeve të sotme, Vullnet Sinaj ka votuar pro hartës së re territoriale në mbledhjen e grupit parlamentar, duke e afruar mazhorancën me 84 votat e kërkuara.
Por Braçe nuk ka ndryshuar qëndrim.
Kjo do të thotë se Rama ende duhet të bëjë llogaritë deri në momentin kur deputetët të ngrenë kartonët në Kuvend.
Balluku, dilema që mbetet hapur
Një tjetër pikëpyetje lidhet me Belinda Ballukun.
Balluku mungoi në mbledhjen e Grupit Parlamentar të PS-së të zhvilluar para nisjes së seancës, ndërsa pjesëmarrja e saj në votimin final mbetet një prej çështjeve që mund të ndikojë në matematikën e mazhorancës.
Në një votim ku duhen 84 deputetë, një mungesë mund të jetë po aq e rëndësishme sa një votë kundër.
Prandaj sytë janë edhe te salla e Kuvendit: kush do të jetë i pranishëm, kush do të votojë pro, kush do të abstenojë dhe kush do të votojë kundër.
Jashtë Kuvendit, protesta nuk ndalet
Ndërkohë që brenda Kuvendit bëhen llogaritë për 84 votat, jashtë godinës situata është përshkallëzuar.
Protestuesit kundër reformës kanë vijuar qëndrimin përballë një pranie të madhe policore, ndërsa protesta është shoqëruar me tensione dhe përplasje.
Pavarësisht shiut, qytetarët kanë vijuar të qëndrojnë në protestë. Gjatë ditës pati edhe shoqërime në komisariat, ndërsa protestuesit e PD-së dhe grupimi “Flamingot” janë shfaqur në të njëjtën protestë kundër reformës.
Kështu, ndërsa jashtë Kuvendit zhvillohet beteja me policinë, brenda tij zhvillohet beteja për kartonët.
A i ka PS-ja 84 votat?
Në letër, mazhoranca ka mundësinë për ta kaluar reformën.
Por në sallën e Kuvendit nuk votohet me llogaritje politike. Votohet me kartonë.
Nëse Sinaj voton pro dhe pjesa tjetër e mazhorancës qëndron në linjë, PS-ja afrohet ndjeshëm me objektivin. Por çdo mungesë dhe veçanërisht qëndrimi i Braçes e mban të hapur dilemën deri në momentin e votimit.
Kjo është arsyeja pse votimi i Territorialen po shndërrohet edhe në një test force për Edi Ramën.
Pas reformës së vitit 2014, mazhoranca po kërkon të ndryshojë edhe një herë hartën administrative të vendit, duke kaluar nga 61 në 46 bashki.
Por këtë herë Rama nuk përballet vetëm me kundërshtimin e opozitës.
Përballë tij është edhe vota brenda vetë PS-së.
Dhe në një Kuvend ku duhen 84 vota, fati i Territoriales mund të vendoset nga vetëm një karton.
Votimi pritet të zhvillohet në orët e vona të mbrëmjes. A do të dalë Rama me 84 vota në fund të kësaj beteje, apo Territorialja do të përplaset me murin e numrave?
© Copyright of PatriotikMedia.al
