Nga Redaksia:
Kuvendi i Shqipërisë miratoi këtë të martë me 79 vota pro një projekt-rezolutë që shpall Iranin shtet sponsor të terrorizmit. Në votim u regjistrua vetëm një abstenim nga deputeti Redi Muçi, ndërsa nuk pati asnjë votë kundër. Opozita zgjodhi të bojkotojë seancën, duke mos marrë pjesë fare në këtë vendimmarrje të rëndësishme.
Ky akt politik, i cili pritet të ketë pasoja të drejtpërdrejta në marrëdhëniet ndërkombëtare të vendit, shihet nga shumë analistë si një rreshtim i hapur i Shqipërisë në një konflikt të madh gjeopolitik, pa një debat të gjerë kombëtar dhe pa transparencë për qytetarët.
Gjatë seancës, kreu i grupit parlamentar të Partisë Socialiste, Taulant Balla, deklaroi se terrorizmi nuk është vetëm akt dhune, por një minim i rendit demokratik. Ai theksoi se Shqipëria qëndron në anën e shtetit të së drejtës dhe përmendi si argument edhe sulmet kibernetike ndaj institucioneve shqiptare, të cilat i cilësoi si akte armiqësore.
Megjithatë, këto deklarata janë vënë në pikëpyetje të forta. Pretendimet për sulme kibernetike nga Irani janë konsideruar nga kritikët si të pabazuara dhe të përdorura më shumë si justifikim politik sesa si fakte të provuara.
Kujtojmë se edhe më parë, në emër të një “sulmi kibernetik”, Shqipëria ndërpreu marrëdhëniet diplomatike me Iranin, një veprim që u interpretua nga shumëkush si një lëvizje për t’i bërë qejfin aleatëve të caktuar ndërkombëtarë Izraelit.
Reagimi i menjëhershëm nga Izraeli vetëm sa e përforcon këtë perceptim. Ministri i Jashtëm izraelit, Gideon Sa’ar, përgëzoi publikisht kryeministrin Edi Rama dhe Parlamentin shqiptar për këtë “rezolutë historike”, duke e cilësuar si një demonstrim të dimensionit moral në politikën e jashtme të Shqipërisë.
Por pyetja që shtrohet është e thjeshtë: a është kjo vërtet një politikë e pavarur dhe në interes të shqiptarëve, apo një rreshtim i verbër në shërbim të interesave të huaja?
Shqipëria, një vend i vogël me probleme të mëdha ekonomike dhe sociale, rrezikon të përfshihet në lojëra të rrezikshme gjeopolitike pa pasur as kapacitetin dhe as interesin për t’u bërë palë. Vendime të tilla nuk sjellin përfitime konkrete për qytetarët shqiptarë, por përkundrazi mund të rrisin rrezikun e ekspozimit ndaj tensioneve ndërkombëtare.
Në vend që të fokusohet në problemet reale të vendit – varfërinë, emigracionin masiv dhe korrupsionin – qeveria e Edi Rama duket se po ndjek një agjendë të jashtme që nuk reflekton prioritetet e shqiptarëve.
Kjo rezolutë mund të shënojë një tjetër hap drejt izolimit strategjik dhe rritjes së tensioneve të panevojshme për Shqipërinë. Në vend të një diplomacie të balancuar dhe në shërbim të interesit kombëtar, vendi po rrezikon të futet në një rrugë pa krye, ku vendimet merren më shumë për të kënaqur të tjerët sesa për të mbrojtur vetveten.