Nga Redaksia:
Avokati Altin Goxhaj ka reaguar ashpër lidhur me zhvillimet e fundit politike dhe me rolin e SPAK në hetimin e zyrtarëve të lartë. Sipas tij, nëse Prokuroria e Posaçme nuk arrin të veprojë ndaj figurave të rëndësishme të pushtetit, atëherë vetë ekzistenca e saj vihet në pikëpyetje.
Në një reagim publik, Goxhaj shprehet se nëse SPAK nuk është në gjendje të arrestojë Belinda Ballukun, atëherë institucioni duhet “të mbyllë dyqanin”. Sipas tij, një situatë e tillë do të tregonte se drejtësia e re nuk është në gjendje të veprojë në mënyrë të barabartë ndaj të gjithë aktorëve politikë.
Ai shkon më tej duke deklaruar se në një rast të tillë SPAK duhet të fillojë duke liruar Ilir Metën dhe Erion Veliajn, si dhe të pushojë çështjet ndaj politikanëve të tjerë, pasi – sipas tij – nuk ka kuptim të ekzistojnë kompetenca që nuk ushtrohen në praktikë.
Goxhaj gjithashtu ironizon mënyrën se si funksionon sot sistemi institucional në Shqipëri. Sipas tij, nëse situata vazhdon kështu, atëherë opozita duhet të propozojë edhe shkrirjen e institucioneve kryesore të drejtësisë, si Gjykata Kushtetuese, Gjykata e Lartë, Gjykata e Apelit dhe GJKKO, duke argumentuar se ndarja e pushteteve ka mbetur vetëm një iluzion.
Në të njëjtin reagim, ai përdor tone të forta politike duke deklaruar se, në këtë logjikë, kryeministri mund të shpallet simbolikisht “Ajetollahu i Shqipërisë”, si një mënyrë për të treguar – sipas tij – përqendrimin e pushtetit në një dorë të vetme.
Në fund të reagimit të tij, Goxhaj ironizon edhe rolin e faktorëve ndërkombëtarë në reformën në drejtësi, duke thënë se Shqipëria duhet t’u dërgojë “nga një shportë me kastraveca si falënderim për Reformën Soros në Drejtësi”.
Deklaratat e avokatit bëhet në një kohë kur drejtësia e re dhe veprimet e SPAK ndaj figurave të politikës mbeten një nga çështjet më të diskutuara në vend.