Nga Redaksia:
Edi Rama ka zgjedhur sërish qiellin, ndërsa qytetarët përballen me tokën që u rrëshqet nën këmbë. Teksa akset drejt juglindjes janë në kolaps dhe zona të tëra përballen me bllokime për shkak të shembjeve e rrëshqitjeve, kryeministri fluturon drejt Korçë me helikopter, në një shfaqje që për shumëkënd ngjan më tepër me luks sheikësh sesa me përgjegjshmëri shtetari.
Fillimisht, Rama deklaron se fluturimi ishte i planifikuar për të shoqëruar investitorë të huaj në Korçë e më pas në Vlorë. Më tej, për të zbutur reagimet, shton se po përdor helikopterin e Forcave të Armatosura për të plotësuar orët e detyrueshme të fluturimit. Një justifikim që më shumë ndez zemërimin sesa e shuan atë.
Rrugët që kushtuan miliona, sot në gërmadha
Ndërsa qytetarët presin me orë të tëra në trafik, përballen me devijime të rrezikshme apo me bllokime totale, kryeministri zgjedh të relativizojë situatën. Me një ton që shumë e konsiderojnë tallës, ai shprehet se rrugët shemben “sepse kështu ndodh kudo”.
Për të mbështetur këtë tezë, Rama sjell si shembull një rrëshqitje masive dheu në Siçili, në Itali. Por krahasimi duket i sforcuar: një rast i izoluar natyror në një qytezë italiane nuk mund të barazohet me problematikat e përsëritura infrastrukturore në Shqipëri, ku rrugë, ura e tunele pësojnë dëmtime të shpeshta pak vite pas inaugurimit.
“Zero përgjegjësi”, sipas Ramës
Në reagimin e tij publik, Rama mohon çdo përgjegjësi qeveritare për bllokimin e aksit, duke e quajtur pasojë të një “rrëshqitjeje gjeologjike” pa lidhje me projektimin apo zbatimin e punimeve. Ai akuzon mediat dhe opozitën për “histeri” dhe “ligësi”.
Por pyetja që shtrohet është e thjeshtë:
A mund të ndahet përgjegjësia politike nga ajo teknike kur bëhet fjalë për investime publike me vlera marramendëse?
Nga “kryeshërbëtor” në sulmues të mediave
Në postimin e tij, Rama nuk kursen as fyerjet për kundërshtarët, duke përdorur metafora si “tenxheret që vlojnë” dhe shprehje të tjera denigruese. Një gjuhë që, në vend të qetësojë situatën, thellon përçarjen dhe krijon perceptimin e një arrogance të institucionalizuar.
Ndërkohë që ai thekson se “karvani do të ecë përpara”, qytetarët pyesin:
Me çfarë rruge do të ecë karvani, kur akset janë të bllokuara?