Nga Redaksia:
Presidenti i Shteteve të Bashkuara të Amerikës, Donald Trump, ka lëshuar një paralajmërim të fortë ndaj Hamasit, duke deklaruar se grupi palestinez duhet të pranojë dorëzimin e armëve brenda javëve të ardhshme, përndryshe do të përballet me pasoja të rënda ushtarake.
Deklarata u bë të mërkurën gjatë një sesioni pyetje-përgjigje pas fjalimit të Trump në Forumin Ekonomik Botëror në Davos, ku presidenti amerikan theksoi se ekziston tashmë një marrëveshje që parashikon çarmatimin e Hamasit.
“Kjo është ajo për të cilën ata kanë rënë dakord. Duhet ta zbatojnë. Dhe ne do ta dimë… brenda dy ose tre ditëve të ardhshme — patjetër brenda dy ose tre javësh — nëse do ta bëjnë apo jo,” deklaroi Trump para audiencës ndërkombëtare.
Ai paralajmëroi qartë se në rast të moszbatimit të marrëveshjes, SHBA-të dhe aleatët e tyre nuk do të hezitojnë të ndërmarrin veprime të menjëhershme.
“Nëse nuk e bëjnë, do të shkatërrohen shumë shpejt. Do të shkatërrohen,” u shpreh Trump me një ton të prerë.
Këto deklarata vijnë në një moment tensioni të lartë në Lindjen e Mesme, ndërsa administrata Trump synon të imponojë një linjë të ashpër ndaj grupeve që i konsideron terroriste, duke përfshirë Hamasin. Mesazhi i presidentit amerikan shihet si një ultimatum i drejtpërdrejtë, që lë pak hapësirë për negociata dhe rrit rrezikun e një përshkallëzimi të ri të konfliktit në rajon.
Forumi i Davosit, i njohur zakonisht për diskutime ekonomike globale, u shndërrua kështu në skenë për një mesazh të fortë gjeopolitik, ku Trump riafirmoi politikën e tij të “forcës dhe vendosmërisë” në arenën ndërkombëtare.