Nga Redi Minga:
Në vitin 2016, Edi Rama deklaronte pa hezitim se Donald Trump ishte një rrezik për Amerikën, botën dhe marrëdhëniet shqiptaro-amerikane. Me tone dramatike dhe moral prej “udhëheqësi global”, Rama thoshte publikisht:
“Mos e dhëntë Zoti që Trump të zgjidhej president.”
Ishte koha kur Rama ndjehej në anën “e duhur” të historisë. Trump për të ishte kërcënim, destabilizues, i rrezikshëm për demokracinë.
Por sot, në vitin 2025, pyetja që shtrohet nuk është më:
“A është Trump rrezik për botën?”
Por: “A është Rama rrezik për Trump dhe Shqipërinë?”
Nga “rreziku i botës” te frika personale e pushtetit
Ironia është se sot Trump nuk përbën rrezik për Amerikën – por sipas shumë analistëve ndërkombëtarë, është bërë rrezik për liderë si Edi Rama.
Pse?
Sepse me rikthimin e fuqishëm të Trump në skenën amerikane, janë rihapur dosje, rrjete, lidhje dhe marrëdhënie të errëta që për vite janë konsideruar “të paprekshme”.
Dhe emri i Edi Ramës nuk është më një emër periferik në këto diskutime.
Rama dhe hijet e rënda të skandaleve ndërkombëtare
Sot Rama nuk është thjesht kryeministër – por figurë që akuzohet publikisht në media ndërkombëtare si pjesë e një strukture të errët pushteti, shpesh i krahasuar në mënyrë indirekte me modele autokratike të tipit Maduro, jo për ideologji, por për metodën e kapjes së shtetit përmes kontrollit të drejtësisë, medias dhe ekonomisë.
Pa harruar këtu:
Çështjen McGonigal, një nga skandalet më të rënda që lidhi emra të lartë amerikanë me interesa të huaja në Ballkan
Akuzat për përdorimin e Shqipërisë si territor kalimi për rrjete kriminale ndërkombëtare
Heshtjen e institucioneve ndërkombëtare që sot po fillon të çahet
Trump, me linjën e tij agresive kundër “Deep State” dhe strukturave të korruptuara, bën që emra si Rama të kenë frikë reale politike, juridike dhe personale.
Sot Trump nuk është rrezik për Amerikën – është rrezik për Ramën
Nëse në 2016 Rama kishte luksin ta quante Trump “rrezik për botën”, sot situata duket e përmbysur:
1- Trump nuk ka nevojë të trembë botën
2- Rama duket se ka arsye reale për t’u trembur
Sepse një drejtësi amerikane e çliruar nga lobet e vjetra, një hetim i thelluar mbi Ballkanin dhe lidhjet politike-oligarke, mund ta vendosin Edi Ramën aty ku shumë shqiptarë kanë kërkuar prej vitesh:
nën lupën e drejtësisë reale, jo asaj të kapur.
Për kë është realisht rrezik Trump?
Në 2016 Rama tha:
Trump është rrezik për botën.
Në 2025 pyetja është:
A është Trump rrezik për Amerikën… apo për Edi Ramën dhe sistemin që ai ka ndërtuar?
Sepse historia ka një zakon të çuditshëm:
Atë që dje e quaje “rrezik”, sot mund ta kesh si frikën tënde më të madhe.