Nga Redi Minga:
Prej vitesh, shqiptarët po shohin një realitet të hidhur: Edi Rama kërkon jo vetëm të dominojë politikën, administratën dhe institucionet, por të qëndrojë * përmbi ligjin*, si një sundimtar mesjetar që nuk njeh kufij, përgjegjësi apo normë juridike. Ajo që ka ndodhur me skandalin IPARD, shembja e financave të shtetit dhe tashmë manipulimi publik rreth çështjes Balluku, është vetëm majë e ajsbergut të një projekti më të madh: kapja totale e shtetit shqiptar dhe vendosja e një pushteti personal arbitrar.
Skandali IPARD – Dëshmia e arrogancës ndaj BE-së
Faktet e njohura tregojnë se Rama dhe kupola e tij vendosën dorë në fonde të Bashkimit Europian, fonde që i përkasin fermerëve dhe zhvillimit rural. Ky akt nuk është thjesht korrupsion; është goditje e drejtpërdrejtë ndaj partnerëve ndërkombëtarë dhe ndaj vetë dinjitetit të shtetit shqiptar.
Shqipëria u gjend e turpëruar në arenën europiane për shkak të një qeverie që e trajton shtetin si pronë personale.
Do të duhen 100 vjet për të riparuar financat që Rama i shkatërroi
Financat publike janë katandisur në pikën më kritike që nga vitet ’90. Borxhi publik, koncesionet, shpenzimet e pakontrolluara, PPP-të klienteliste – të gjitha kanë marrë trajtën e një gropë të zezë ekonomike që do t’i duhet një shekull Shqipërisë ta rikuperojë.
Ky është dëmi i një pushteti që nuk njeh frena, që nuk njeh përgjegjësi, dhe që vepron vetëm për mbijetesën e vet politike.
Çështja Balluku – tym në ajër për të fshehur kaosin e kryeministrit
Në momentin që drejtësia dhe opinioni publik po ngushton rrethin ndaj Ramës, ai hedh në treg çështjen Balluku si një lëvizje të orkestruar, një zhvendosje vëmendjeje, një tymnajë e qëllimshme për të mbajtur të paqartë opinionin publik.
Por ligji flet qartë. Dhe pikërisht ligji është ai që Rama përpiqet të shtypë nën këmbë.
Ligji nr. 115/2020 – prova që Rama po tradhton shtetin e së drejtës
Ligji nr. 115, datë 30.11.2020, i miratuar vetë nga Kuvendi me propozimin e Këshillit të Ministrave, thotë shprehimisht:
“Kur ndaj deputetit është caktuar masa e sigurimit ‘pezullim nga detyra’ sipas Kodit të Procedurës Penale, ai PEZULLOHET AUTOMATIKISHT nga ushtrimi i funksioneve të ministrit, zëvendësministrit apo çdo funksioni tjetër publik.”
Ky ligj nuk lë vend për interpretim. Është i qartë, i prerë dhe i pakundërshtueshëm.
Dhe megjithatë, analistët e ekranit – të njëjtët që ushqehen me paratë e qeverisë – nuk e përmendin. Ata heshtin, sepse ky ligj rrëzon themelet e alibive të Ramës.
Problemi i vërtetë: Shqipëria drejtohet nga një njeri që nuk njeh kufi
Rama nuk po tenton të shpëtojë Ballukun; ai po tenton të shpëtojë vetveten.
Ai kërkon të jetë mbi ligjin, mbi Kushtetutën, mbi institucionet, mbi popullin.
Ky është rreziku i madh që shqiptarët duhet të kuptojnë: arbitrariteti i kryeministrit nuk është më politikë — është kërcënim ndaj vetë shtetit.