Nga Redaksia:
Arsimi i lartë shqiptar është sot një fushë e djegur, një truall i rrënuar nga korrupsioni, injoranca dhe tradhtia e qëllimshme ndaj brezave të rinj. Shqipëria dikur krenohej me profesorë, akademikë dhe studentë që ndriçonin auditorët me mendim të lirë dhe pasion për dijen. Sot, auditorët janë bosh, laboratorët të mykur, ndërsa dija është kthyer në mall tregu.
Në çdo fillim viti akademik pritet që “ekspertët”, “gazetarët e fushës” apo “opozitarët” e radhës të flasin për arsimin. Por askush nuk e bën. Heshtin të gjithë — sepse janë pjesë e së njëjtës kupolë që ka zhbërë çdo vlerë akademike në këtë vend.
Rasti i Universitetit Bujqësor të Tiranës, ku 24 zyrtarë të lartë janë nën hetim nga SPAK për abuzime, është vetëm maja e ajsbergut. E njëjta mënyrë zhvatjeje, njësoj e pistë, është bërë model pune në pothuajse të gjitha universitetet publike shqiptare.
Diploma që shiten, doktoratura që kopjohen, gradime që blihen, profesorë që nuk botojnë asnjë studim shkencor, por mbushin oraret me studentë që trajtohen si klientë. Dhe në krye të kësaj piramide qëndrojnë rektorë dhe dekanë të korruptuar, të cilët kanë në duar edhe universitete private, duke minuar çdo konkurrencë të ndershme e çdo standard akademik.
Pedagogët e sotëm e shohin universitetin publik si “punë të dytë” për të marrë një pagë shtesë. Jepin mësim në disa universitete private njëkohësisht, kanë biznese të tyre dhe nuk kujtohen asnjëherë të botojnë një punim, një studim, një libër.
Meritokracia është varrosur. Dija është zëvendësuar nga servilizmi. Diploma është kthyer në letër pa vlerë.
Në vend të auditorëve ku mësohet, kemi zyra ku negociohet. Në vend të kërkimit shkencor, kemi tendera e favore. Në vend të vlerësimit të dijes, kemi gradime për militantë dhe kushërinj.
Universitete me histori, si Bujqësori, Politekniku, apo Shkencat e Natyrës, janë sot rrënoja morale. Dhe kjo nuk ka ndodhur rastësisht. Është bërë qëllimisht, për ta zbehur dijen, për ta larguar rininë e aftë dhe për ta mbajtur kombin në errësirë. Sepse një komb pa dije është më lehtë për t’u sunduar.
Kjo është strategjia më e ndyrë e pas ’90-ës: shkatërro arsimin dhe ke shkatërruar Shqipërinë.
Të rinjtë e zgjuar po largohen. Të paaftët dhe të korruptuarit ngjiten në poste.
Universitetet nuk prodhojnë më dijetarë, por servilë të pushtetit dhe tregtarë të diplomave.
Ministria e Arsimit dhe Sportit është sot një institucion i vdekur. Nuk ka strategji, nuk ka kontroll, nuk ka vizion.
Në vend të reformave reale, kemi konferenca propagandistike. Në vend të transparencës, kemi mashtrime dhe fasada.
Askush nuk mban përgjegjësi për kolapsin e arsimit, sepse gjithë sistemi është bërë një zinxhir interesash ku çdo hallkë ushqen tjetrën.
Në këtë realitet të zi, një e vërtetë e hidhur qëndron mbi gjithçka: shqiptarët nuk po humbasin vetëm universitetet – po humbasin vetveten.
Një komb që shkatërron arsimin e vet, po vret të ardhmen.
Një komb që nuk nderon dijen, po mban gjallë injorancën.
Prandaj, studentëve që kanë mundësi të studiojnë jashtë, u thuhet me dhimbje: shkoni, mësoni, fitoni dije të vërtetë dhe mos harroni kurrë prej nga vini. Sepse Shqipëria do t’ju duhet përsëri – për ta ngritur nga hiri kur kjo elitë e kalbur të ketë mbaruar punë me të.
Arsimi i lartë në Shqipëri nuk ka nevojë për reforma kozmetike, por për spastrimin moral e kombëtar të sistemit që e ka zaptuar.
Pa këtë pastrim, çdo universitet do të mbetet një piramidë korrupsioni dhe çdo diplomë një fletë mashtrimi.
Sepse në fund, pa dije nuk ka komb. Pa integritet nuk ka Shqipëri.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.