By redaksia 
Nga redaksia e PatriotikMedia.al
Një tjetër goditje e rëndë për iluzionin e demokracisë shqiptare vjen nga raporti më i fundit i institutit ndërkombëtar V-Dem, një prej institucioneve më të respektuara në botë për matjen e standardeve demokratike. Sipas raportit të vitit 2024, Shqipëria është rrëzuar në kategorinë “autokraci zgjedhore”, duke u renditur në vendin e 82-të nga 179 shtete të analizuar. Po, e lexuat mirë. Shqipëria është renditur në të njëjtën kategori me diktatura si Rusia, Egjipti dhe Kazakistani.
Kjo nuk është thjesht një renditje statistikore. Ky është një aktakuzë ndërkombëtare ndaj një regjimi që ka shpërbërë institucionet demokratike, ka kapur drejtësinë dhe mediat, dhe ka kthyer votimet në formalitet pa thelb. Një sistem ku qytetarët thjesht shkojnë te kutitë e votimit për të legjitimuar një klikë që nuk ndërron kurrë, ndërkohë që opozita shtypet, aktivistët përndiqen dhe shteti sillet si pronë personale e një grushti oligarkësh të lidhur me qeverinë.
Ku jemi katandisur: Nga NATO në “grupin e Rusisë”
Shqipëria është vend anëtar i NATO-s, një aleancë që u themelua për të mbrojtur demokracitë perëndimore nga autokracitë lindore. Dhe sot, sipas raportit të V-Dem, Shqipëria rreshtohet krah për krah me Bjellorusinë e Lukashenkos dhe Rusinë e Putinit. Ky është një turp historik. Dhe është pasojë direkte e keqqeverisjes 12-vjeçare të Edi Ramës, një njeri që ka ndërtuar një sistem personal pushteti të stilit oriental, i cili funksionon mbi patronazh, korrupsion dhe kontroll total të pushteteve.
Demokracia shqiptare është në koma
Fakti që zgjedhjet organizohen nuk do të thotë se jemi demokraci. Edhe Rusia organizon zgjedhje. Por ato nuk janë të ndershme. E njëjta gjë ndodh edhe në Shqipëri, ku pushteti kontrollon gjithçka – nga media, tek drejtësia dhe shërbimi civil. Opozita përjashtohet sistematikisht, mediat e pavarura mbyllen ose blihen, dhe qytetarët janë të frikësuar të protestojnë. Ky është definicioni i autokracisë zgjedhore. Dhe sot e kemi të shkruar me shkronja të zeza në raportin e V-Dem: Shqipëria nuk është më një demokraci funksionale.
Kush ka heshtur është bashkëfajtor
PatriotikMedia.al ngre zërin me forcë dhe pa kompromis kundër këtij degradimi politik. Ne nuk do të heshtim përballë këtij rrënimi institucional. Jemi në një moment ku duhet të zgjedhim: ose do të dorëzohemi përfundimisht dhe do të jetojmë si skllevër nën një regjim të butë, por të pandryshueshëm, ose do të ngremë krye si qytetarë të lirë dhe do të kërkojmë rikthimin e një demokracie të vërtetë.
Një mesazh për aleatët perëndimorë
Ne i bëjmë thirrje administratës së re amerikane, nën drejtimin e Presidentit Donald J. Trump, të shikojë me vëmendje këtë krizë në një vend aleat si Shqipëria. Koha e kompromiseve me autokratë pseudo-europianë ka mbaruar. Është koha për sanksione të qarta ndaj çdo qeverie që shkel themelet e demokracisë në Ballkan. Sepse nëse nuk ndëshkohen tani, nesër do jetë vonë.
Shqipëria nuk është prone e një njeriu të vetëm. Shqipëria është e shqiptarëve!
Ndalohet kopjimi dhe shpërndarja pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.