By redaksia 
Washington, D.C. – Presidenti i Shteteve të Bashkuara, Donald J. Trump, ka deklaruar se një marrëveshje për t’i dhënë fund konfliktit në Rripin e Gazës është shumë afër, ndërsa ka lënë të hapur edhe mundësinë e një pakti të ri për programin bërthamor të Iranit.
Gjatë një deklarate në Zyrën Ovale, Trump u shpreh optimist:
“Janë shumë afër një marrëveshjeje për Gazën dhe ne do t’ju njoftojmë për këtë gjatë ditës ose ndoshta nesër. Kemi një shans të madh për paqe.”
Duke iu referuar Iranit, Presidenti Trump theksoi:
“Mendoj se kemi një shans për të bërë një marrëveshje edhe me Iranin. Ata nuk duan të hidhen në erë. Ata do të preferonin të bënin marrëveshje. Dhe mendoj se kjo mund të ndodhë në një të ardhme jo shumë të largët.”
Deklarata e tij vjen në një moment kritik për Lindjen e Mesme. Hamasi konfirmoi të premten se është në konsultime me grupe të tjera palestineze për një propozim të fundit mbi një armëpushim dhe shkëmbim të të burgosurve, të paraqitur nga i dërguari i posaçëm amerikan, Steve Witkoff.
Sipas raportimeve ndërkombëtare, kryeministri izraelit Benjamin Netanyahu e ka pranuar draftin e këtij propozimi, i cili përfshin:
Një armëpushim 60-ditor
Lirim të ndërsjellë të pengjeve dhe të burgosurve
Bisedime për të ardhmen politike dhe humanitare të Gazës
Dorëzimin nga Hamasi të dhjetë robërve izraelitë të gjallë dhe mbetjeve mortore të 18 të tjerëve, në dy faza
Për sa i përket Iranit, Trump theksoi edhe një herë qëndrimin e tij të fortë:
“Ata nuk mund të kenë armë bërthamore. Është shumë e thjeshtë dhe mendoj se jemi mjaft afër një marrëveshjeje me Iranin.”
Shtetet e Bashkuara dhe Irani kanë zhvilluar pesë raunde negociatash indirekte në Muskat dhe Romë, të ndërmjetësuara nga Omani. Megjithatë, negociatat kanë ngecur për shkak të mosmarrëveshjeve mbi pasurimin e uraniumit, një pikë kyçe në programin bërthamor të Teheranit. Sipas burimeve diplomatike, SHBA kërkon ndalimin e plotë të pasurimit, ndërsa Irani këmbëngul se do ta vazhdojë atë “me ose pa marrëveshje”.
Ky artikull është i mbrojtur nga e drejta e autorit. Kopjimi i plotë apo i pjesshëm i tij pa leje të shkruar ndalohet rreptësisht sipas ligjit shqiptar dhe atij ndërkombëtar për të drejtat e autorit.